Որքան էլ ձեր շնասեր ընկերները, մարզերից կամ արտասահմանից ամառային հանգստի հյուր եկած բարեկամները կամ այլոք փորձեն համոզել, թե շունն անպայման պետք է ոսկոր ուտի (էլ ի՞նչ շուն, եթե ոսկոր չուտի, չգիտե՞ք, թե որքան կարևոր է ատամերի համար, բա հում միսը, շունը չի կարող առանց հում մսի, հիվա՞նդ է, օղի խմեցրու, բերանը բացի՛ր ու կոնյակ լցրու, և այլն), մեկ է, եկեք չմոռանանք, որ մեր բոլորիս կողմից այսօր այդքան սիրելի ցեղատեսակները մարդը ստացել է արհեստական ճանապարհով բուծելիս` ընտրելով իր համար կարևոր որակները:
Ստացված նոր ցեղատեսակներից յուրաքանչյուրն առանձնահատուկ է` օժտված հետաքրքիր որակներով, սակայն նրանք ավելի մոտ են կանգնած մարդուն, քան նրանց գիշատիչ նախնիները: Շների դիմադրողականությունն ավելի թույլ է, ստամոքս-աղիքային համակարգն ավելի նուրբ է, որոշ բնազդներ նրանց մեջ քնած են, ինչի համար գոնե մենք՝ նրանց խնամակալները, պետք է ավելի զգոն և ուշադիր լինենք: Այսպես, ստորև ձեզ ենք ներկայացնում շների օրվա կերաբաժնում արգելված սննդային բաղադրիչները, որոնք այս կամ այլ կերպ կարող են վնասել մեր փոքրիկ ընկերներին.
✓ Ոսկոր
Չնայած տարածված կարծիքին, թե շները պետք է ոսկոր ուտեն, մասնագետները փաստում են, որ ստամոքս-աղիքային համակարգի մի շարք խնդիրներ շատ հաճախ առաջանում են շանը ոսկորով կերակրելու հետևանքով (աղիների խցանումից մինչև սուր ոսկորներով ստամոքսի կամ աղիների պատերի մեխանիկական վնասվածքներ):
✓ Ցանկացած քաղցրավենիք, շաքարավազ, շաքարավազի փոխարինիչներ
Սննդում քաղցրի առկայությունից շների մոտ կարող են առաջանալ այն նույն խնդիրները, որոնք առաջանում են մարդկանց մոտ, սակայն նրանց մոտ դրանք արտահայտվում են շատ ավելի բուռն կերպով(տեսողության, ատամների խնդիրներ, շաքարային դիաբետ, ճարպակալում), իսկ փոխարինիչներն ավելացնում են արյան մեջ շաքարի մակարդակը, ինչը հանգեցնում է սրտխառնոցի, փսխման, թուլության և այլն:
✓ Շոկոլադ, սուրճ, թեյ և ընդհանրապես կոֆեին պարունակող ցանկացած մթերք
Այս մթերքները, բացի արդեն վերը նշված շաքարի պարունակությունից, իրենց մեջ ունեն տեոբրոմին, տեոֆիլլին և կոֆեին, որոնք կարող են առաջացնել փսխում, ստամոքս-աղիքային տրակտի խանգարումներ և տոքսիկ են նյարդային համակարգի համար:
✓Բրոկոլլի
Որքան էլ տարօրինակ թվա, դրա մեծ քանակությունը թունավոր է նույնիսկ մարդկանց համար:
✓ Ալկոհոլ
Շների օրգանիզմում շատ քիչ են ալկոհոլ ճեղքող հակամարմինները, ինչի պատճառով շունը կարող է ընկնել կոմայի մեջ կամ ավելի վատ՝ սատկել:
✓ Մրգեր, հատապտուղներ
Հատկապես դեղձ, խաղող (չամիչ), սալոր, ցիտրուսային մրգերը պարունակում են շան երիկամների և լյարդի համար ծայրահեղ ծանր ազդեցությամբ տոկսիններ և թթուներ:
✓ Սնկեր
Կրկին թունավորման և ստամոքս - աղիքային համակարգի վնասումից զերծ մնալու նկատառումներով:
✓ Խմորիչով պատրաստված խմորեղեն
Խմորման գործընթացը շարունակվում է արդեն կենդանու օրգանիզմում, արտազատվում են գազեր, որոնք հանգեցնում են վքնածության:
✓ Յուղ, յուղոտ կերակուր - կարող է առաջացնել լուծ, փսխում:
✓ Լոբազգիներ - առաջացնում են գազեր:
✓ Խոզի և ոչխարի միս - չափազանց յուղային է և կարող է առաջացնել սրտխառնոց, փսխում, լուծ:
Բացի արգելված սննդամթերքից, պետք է հիշել, թե ինչ է կարելի տալ շանը սահմանափակ քանակով.
✓ Աղ - չոր տեսքով աղ չի կարելի ընդհանրապես, իսկ կերակրուրը պատրաստելիս պետք է հաշվարկել մարդու խոհանոցում ընդունված նորմայից 10 անգամ ավելի քիչ չափաբաժնով:
✓ Կաթնամթերք - հասուն առանձնյակներին ընդհանրապես պետք չէ կաթ տալ, հատկապես, որ այն այլևս օգտակար չէ նրանց օրգանիզմին: Թթվասեր, կեֆիր, մածուն, կաթնաշոռ կարելի է տալ՝ վերահսկելով դրանց յուղայնությունը և ընդհանուր քանակը կերաբաժնում:
✓ Սոխ - քիչ քանակությամբ, այն էլ միայն կերակրի մեջ:
✓ Ձու - պարունակում է ավիդին ֆերմենտ, որը խանգարում է վիտամին B-ի բնականոն սինթեզին:
Hafo.am-ի անձնակազմն առողջ և համով կյանք է մաղթում շնիկներին:
