Ձգողականանությունն այն ուժն է, որի ազդեցությամբ բոլոր առարկաներն ընկնում են գետնին: Ցանկացած առարկա ունի իր զանգվածի կենտրոնը, որի վրա ամենաշատն է ազդում ձգողականությունը: Օրինակ, երբ մենք վերցնում ենք որևէ ծանրակշիռ իր, բնազդաբար ջանում ենք դրա տեղափոխման կամ ուղղակի բարձրացման համար բռնել նրա ծանրության կենտրոնից, քանի որ այդպես ավելի հեշտ է ստացվում պայքարել ձգողականության ուժի դեմ:
Նույն կերպ է նաև կենդանի մարմինների դեպքում: Մարդիկ, կապիկները, փղերը, շները և մնացած բոլոր ներկայացուցիչներն ունեն ծանրության կենտրոն: Օրինակ, մարդու ծանրության կենտրոնը տեղակայված է գոտկային հատվածում, իսկ շների մոտ մոտավորապես թիակների հատվածում, ահա թե ինչու են նրանք կարողանում հեշտորեն հարմարվել, երբ վնասվածքներ են ունենում հետին վերջույթների հատվածում: Սակայն ճիշտ հակառակ դեպքում՝ առջևի վերջույթների վնասվածքների դեպքում շատ ավելի շատ է արտահայտվում նրանց խնդիրը:
Վերոհիշյալի վառ ապացույցը կարող են լինել մեզանից յուրաքանչյուրի հիշողության մեջ դաջված դեպքերը, երբ հանդիպել ենք եռոտանի շունիկների, կամ, օրինակ, ամբողջ համացանցը հաջողությամբ գրաված Շի Բաոն: Որքան էլ որ զարմանալի լինի, Չինաստանի երկաթուղային կայարաններից մեկում (Շանսի գյուղական տարածքի Դատոնգ շրջանի Կոուգուան կայարանում) բնակվող այս երկոտանի շունը լույս աշխարհ է բերել չորս կատարյալ առողջ ձագուկի:
Շի Բաոն ժամանակին տեր է ունեցել, սակայն անհասկանալի պատճառներով (հիմնականում գյուղական տարածքներից քաղաքի որևէ շքեղ երկնաքերում բնակություն հաստատելու նպատակով տեղափովելիս չինացի գյուղացիները լքում են իրենց չորքոտանի ընկերներին՝ թողնելով նրանց բախտի քմահաճույքին) նրան լքել են:
Փոքրիկ, անօգնական շունը նոր բնակավայր է իր համար ընտրել երկաթգծի կայարանը, որտեղ ապահով է եղել (բոլորիս համար հայտնի փաստ է, որ չինացիները իրենց մսամթերքի ցանկում հպարտությամբ նշում են նաև շան միսը) և որտեղ ավելի հեշտ էր սնունդ հայթայթել, քանի որ աշխատողները շատ են սիրել շանն ու սկսել են նրան կերակրել:
Սակայն փաստ է նաև, որ շների համար մեծ վտանգ են նաև տրանսպորտային միջոցները: Շի Բաոն մի սարսափելի օր ընկել է գնացքի տակ՝ կորցնելով վերջին զույգ վերջույթները, բայց արագ ապաքինվել է և սովորել քայլել՝ հենվելով միայն առջևի վերջույթների վրա, իսկ որ էլ ավելի զարմանալի է՝ նա հղիացել է, պատվով ու առողջ ծննդաբերել չորս առողջ ձագուկ և նույնքան մեծ պատաասխանատվությամբ էլ խնամում է նրանց:
Կայարանի աշխատակիցները սիրում են նաև Շի Բաոյի ձագուկներին, սակայն Չինաստանում օր օրի ավելի է լրջնում անտուն կենդանիների հարցը, քանի որ բացի այն, որ նրանց բռնում են սպանելու նպատակով, ուտելու նպատակով որսացողները կենդանիներին պահում են շատ վատ պայմաններում՝ անհամաչափ փոքրիկ վանդակներում, առանց ջուր, առանց սնունդ: Ինչևէ, հուսանք որ գոնե այս հերոսուհու ձագուկները կունենան առողջ մանկություն և ապահով կյանք:
Շնորհիվ ծանրության կենտրոնի այսպիսի տեղակայման, շները կարող են բավական զվարճալի արարքներ անել՝ անգամ չորս առողջ վերջույթներ ունենալով: Այսպես, կան կենդանասերներ, ովքեր պատմում կամ YouTube են տեղադրում իրենց չորքոտանի կենդանիների հերոսությունները հետին վերջույթները «գրպանում դրած» դիրքում: Որոշ շնիկներ ուղղակի չեն օգտվում իրենց հետին վերջույթներից աստիճաններն իջնելիս. բարձրացնում են, պահում վերևում ու միայն առջևի թաթիկներով շատ արագ իջնում 8-10 աստիճան, հետո ուղղակի հետևի վերջույթներով հարվածում գետնին, նորից բարձրացնում ու շարունակում ակրոբատիկ համարը:
Կան ձագուկներ, որոնք սնվելիս բարձրացնում են հետևի վերջույթները և առանց տատանվելու շարունակում են ուտել: Համացանցում կարելի է գտնել Չիհուահուա ցեղատեսակի շան տեսանյութը, որտեղ նա բավական երկար տարածություն միաժամանակ քայլում է առջևի վերջույթների վրա և միզում: Չնայած նրանց օրգանիզմի հարմարվողականության բարձր հնարավորության՝ բնականաբար լավագույն հարմարավետությունը նրանց ֆիզիկական ամբողջականությունն է. չորս ոտք, ամեն ինչ հոտոտող թաց քիթիկ, ամեն ինչ լսող ականջներ և տրամադրության մասին պատմող պոչիկ:
Սիրով Hafo.am։ Եղե՛ք տեղեկացված
