Մեր օրերում կենդանասերները հաճախ իրենց չորքոտանի բարեկամներին նույնացնում են փոքրիկ երեխաների հետ: Շատ գովելի է, երբ կա այդքան մեծ սեր, ուշադրություն և նրանց համար ամեն բան անելու մեծ ցանկություն, սակայն պետք է նաև միշտ հիշել, որ շնիկների օրգանիզմը շատ ավելի արագ է աճում, բայց և ավելի նուրբ է և խոցելի: Ուստի կերակրման ճիշտ ռեժիմը, չափաբաժինը, համապատասխան անհրաժեշտ հանքային նյութերով և վիտամիններով հարստացված սնունդը շատ մեծ նշանակություն ունեն կենդանու առողջ զարգացման, աճի, դաստիարակության գործում:
Դե իհարկե այս ամենը հաշվարկելիս շատ բան է պետք հաշվի առնել
Այնուամենայնիվ կան համընդհանուր կանոններ, որոնք պետք է պահպանել բոլոր դեպքերում: Թվում է թե այդ կանոնները ակնառու են, սակայն շատ կենդանասերներ, դրանց ուղղակի չեն հետևում և կերակրում են իրենց փոքրիկ, փափուկ ընկերներին «ինչպես ստացվի»՝ չապահովելով նրանց օրգանիզմին անհրաժեշտ սննդանյութերով, ինչն էլ իր հերթին նվազեցնում է շան դիմադրողականությունը, վնասում առողջությունը և կարող է հանգեցնել անդառնալի ավարտի:
Սնվելու ժամը շան համար ամենահաճելի և կենսական կարևորության ժամերից մեկն է: Դա պայմանավորված է կարևոր բնազդներով և պայմանական ռեֆլեքսով (բոլորս էլ լավ հիշում ենք կենսաբանության գրքում առկա Պավլովի մեթոդի մասին նյութը), սնվելուց առաջ և հետո որոշակի հորմոնալ ֆոնի առկայությամբ:
Այսպես, կերը չպետք է ողջ օրը կենդանու առաջ դրված լինի: Կարևոր է կենդանուն կերակրել ռեժիմով, միշտ նույն ժամերին, իսկ հետո կերամանը պետք է վերցնել, լվանալ և պահել մինչ հաջորդ կերակրման ժամը: Պետք է կերակրման գործընթացը կազմակերպել զբոսանքից հետո:
Շների մոտ սննդանյութերի յուրացումը (մարսումը) նորմայում տևում է 6-7 ժամ, այդ ընթացքում նպատակահարմար է ֆիզիկապես հանգիստ վիճակ ապահովել: Կերակրման հիմնական ժամերի միջակայքում ուրիշ ոչինիչ պետք չէ նրանց տալ:
Պետք չէ թույլ տալ նրանց սնվել սեղանի մոտ, իհարկե դժվար է խնդրող, աղերսող հայացքը մերժել, բայց անհնար չէ, բացի այդ, դա դաստիարակության կարևոր կողմերից է. որոշ ժամանակ անց շունը կդադարի խնդրել սեղանից կերակրել իրեն:
Քանի որ շունը ինքնուրույն չի կարող ընտրել ճիշտ ռացիոն, ապա պետք է գոնե նրա խնամակալը դա իրականացնի: Պետք է հիշել, որ շունը գիշատիչ է, ուստի նրա սննդի 40-50% պետք է լինի մսամթերք: Եթե որոշում է կայացվել կերակրել շանը չոր կերով, ապա պետք է ընտրել կոնկրետ ձեր շան համար ամենահարմար տարբերակը՝ խորհրդակցելով նրա բուժող բժշկի հետ:
Չոր կերը պետք է ընտրել շատ մանրամասն ուսումնասիրելուց հետո. պետք է հաշվի առնել, արդյոք այն ապահովում է անհրաժեշտ բոլոր նյութերը, թե պետք է հավելել հանքային նյութեր, վիտամիններ: Խորհուրդ չի տրվում չոր կերն ընտրելիս մտածել դրամական միջոցների խնայողության մասին:
Ի տարբերություն կերամանի, թարմ , հաճելի սառնությամբ ջրով լի ջրամանը պետք է ամբողջ օրվա ընթացքում լինի հասանելի:
Շանը անհրաժեշտ է ազոտի հարուստ միացություններով սպիտակուցներ (դրանք կենդանական մթերքում են, հատկապես մսի մեջ):
Ածխաջրեր, որոնք շունը ստանում է կերի մեջ առկա օսլայից և շաքարից (պետք չէ շփոթել քաղցրի, կոնֆետների, շոկոլադի հետ, խոսքը սննդամթերքում առկա շաքարի մասին է):
Շան սնման կարևոր էներգետիկ դեր խաղացող ճարպեր, բավարար չափով (բայց ոչ հավելյալ):
Փոքրիկ ձագուկներին և երիտասարդ շներին կերակրում են մի փոքր ավելի շատ, քան հասուն և ծեր շներին, քանի որ առաջինները դեռ աճում են, իսկ երկրորդներին պետք է շատ հետևել, խուսափել ճարպակալումից: Իհարկե պետք է անպայման հաշվի առնել նաև շան զբաղվածությունը, ցեղատեսակի առանձնահատկությունը:
Օրինակ ծառայողական կամ որսորդական շանը չի կարելի է թերսնել, քանի որ նրանք անընդհատ աշխատում են, իսկ լաբրադորի, մոպսի կերաբաժինը պետք է միշտ լինի ուշադրության կենտրոնում, քանի որ նրանք ունեն ճարպակալման հակվածությունը:
Եվ միշտ պետք է հիշել՝ ցանկացած նոր սնունդ տալիս, պետք է խորհրդակցել մասնագետի հետ, քանի որ հնարավոր է այն անվնաս լինի մարդկանց, երեխաների համար, սակայն շանը լինի հակացուցված: Եղեք ուշադիր և «ճիշտ» սիրեք շունիկներին,
Նյութը ՝ Hafo.am -ի
