Սիրելի՛շնասերներ, բացի շուն որդեգրելուց և նրան անչափ սիրելուց, անհրաժեշտ է նաև ճիշտ և գրագետ պահել` դաստիարակել, սովորեցնել որոշ բաներ, հետևել առողջությանը։ Իհարկե միայնակ զբաղվել այդ ամենով, այդքան էլ հնարավոր չէ։ Ավելի լավ է դիմել համապատասխան մասնագետների՝ կինոլոգների և անասնաբույժների։ Իսկ գիտե՞ք նրանց տարբերության մասին։
Այսպիսով Hafo.am- ն այսօր անդրադարձել է այս կարևոր հարցին։ Մինչ տարբերությանն անցնելը, մի փոքր ներկայացնեմ այս 2 մասնագիտության էությունը՝
Կինոլոգներ
Կինոլոգիա տերմինը հին հունարենից բառացի թարգմանաբար նշանակում է ''գիտություն շների մասին'' : Կարճ ասած՝ կինոլոգիան առնչվում է այն բոլոր հարցերի հետ, որոնք կապ ունեն շների վարժեցման, դաստիարակման և նրանց իրավասու բուծման հետ: Ցեղական շների ճիշտ ու գրագետ բուծման համար որակավորված կինոլոգը պետք է ունենանա համապատասխան կիրառական գիտելիքներ:
Բացի դրանից, կինոլոգներն ըստ մասնագիտական հմտությունների բաժանվում են հետևյալ խմբերի՝
1. Ֆիտնես-կարգավորողներ
2. Վարժեցնողներ
3. Կինոլոգ-կարգավորողներ
4. Կինոլոգ-մասնագետներ
5. Դիետոլոգներ
Վերջիններիս ֆունկցիաների մեջ է մտնում ոչ միայն ցեղական շների սննդակարգի ճիշտ ու բալանսավորված կազմակերպումը, այլև ցանկացած այլ շան համար սննդակարգի ճիշտ ու գրագետ կազմակերպումը:
6. Մասնագետներ, ովքեր շներին սովորեցնում են իրականացնել տարբեր պաշտպանական մեխանիզմներ
7. Էքսպերտ-կինոլոգներ
Ավելի հաճախ այս մասնագետները հանդես են գալիս որպես ժյուրիի անդամներ ցանկացած տեսակի ցուցահանդեսների և մրցույթների համար:
8. Խորհրդականներ ծառայողական շների վարժեցման գործում
Այս մասնագետները վարժեցնում են շներին որպես փրկարարներ, հետախույզներ և ներքին օրգաններում ''աշխատող'' անդամներ:
9. Կինոլոգ-հոգեբաններ
Կոպիտ ասած՝ այս մասնագետները շների հոգեբաններն են:
10. Հենդլերներ
Այս մասնագետներն ամբողջական կուրսեր են անցկացնում շների հետ և նախապատրաստում նրանց ցուցահանդեսների ու մրցույթների համար:
Անասնաբույժներ
Անասնաբույժները բժշկական մասնավոր մասնագետներ են, ովքեր զբաղվում են կենդանիներին (խոզ, ձի, նապաստակ, մանր և խոշոր եղջերավոր անասուններ, տնային թռչուն, մուկ, շուն, կատու և այլն) առնչվող առողջական խնդիրներով: Անասնաբույժն իր տեսական ու գործնական հմտություններով չի զիջում մարդու առողջությամբ զբաղվող բժշկին: Նա համապատասխանաբար պետք է իմանա անատոմիա, ֆիզիոլոգիա, պաթֆիզիոլոգիա, միկրոբիոլոգիա և այլն: Անասնաբույժն ունի միջին կամ բարձրագույն կրթություն, ով պատրաստ է իր վրա կրել նման պատասխանատվություն և զբաղվել կենդանիների առողջությամբ ։
Պարտականություններ՝
1․Բուժկանխարգելիչ և պրոֆիլակտիկ աշխատանքների իրականացում հիվանդ կենդանիների հետ
2․Տարբեր բժշկական գործընթացների կիրառում, վակցինացիա, վիրահատական միջամտություն, անասնաբուժական և սանիտարական հսկողության կազմակերպում:
Անասնաբույժի գլխավոր պարտականությունն այն է, որ նա կարողանա նշանակել ճիշտ բուժում և անցկացնել ճիշտ պրոֆիլակտիկ աշխատանքներ հիվանդ կենդանիների հետ: Բացի այդ, անասնաբույժը կարող է զբաղվել սննդի փորձաքննությամբ, հաստատել պիտանելիության ժամկետը և թույլատրել այն վաճառքի ու օգտագործման համար:
Այսպիսով՝ անասնաբույժները այն մարդիկ են, ովքեր զբաղվում են կենդանիների առողջությամբ և նրանց բուժմամբ, իսկ կինոլոգները՝ ովքեր զբաղվում են շների վարժեցմամբ, դաստիարակությամբ և ցեղական շների բուծմամբ։
Սիրով Hafo.am։ Եղե՛ք տեղեկացված
