Մեր օրերում կենդանասերները հաճախ են գանգատվում, թե նրանց շան մազերը թափվում են: Հարկ է նշել, որ ոչ պաթոլոգիկ դեպքերում կյանքի որոշակի փուլերում մազաթափությունը բնական գործընթաց է, որքան էլ որ այն իրական փորձություն հանդիսանա խնամակալների համար (հատկապես միջին և մեծ չափերի երկարամազ շների դեպքում):
Բնականոն հունով ընթացող մազաթափությունը տեղի է ունենում տարեկան երկու անգամ՝ գարնանն ու աշնանը, իսկ տևողությունը կազմում է երկու շաբաթից մինչև 1.5 ամիս, հազվադեպ կարող է մի փոքր ձգձգվել:
Շան բրդի վիճակը կենդանու ներքին առողջական վիճակի ցուցանիշն է: Եթե զբոսնելիս բոլորը ուշադիր նայում են նրա խնամված, գեղեցիկ մազածածկույթին, վերջինս փայլում է արևի տակ, իսկ բոլոր երեխաները պարզապես նետվում են դեպի ձեր շնիկը՝ նրան շոյելու համար, ապա ձեր չորքոտանի ընկերը միանգամայն առողջ է:
Եթե ձեր շան մոտ նկատվում է խիստ մազաթափություն, բուրդը չի փայլում, կորցրել է փափկությունը, իսկ կենդանին հաճախ է քորվում, ապա պետք է անհապաղ նրան տանել անասնաբույժի մոտ, հանձնել անալիզներ, որովհետև օրգանիզմում ինչ-որ բան այնպես չէ:
Այն տեղի է ունենում աշնանն ու գարնանը: Աշնանը թափվում են ամառային բարակ մազերը և օրգանիզմը սկսում է հավաքել ձմեռային տաք, հաստ մազերի շերտ, որի տակ էլ փոքրիկ, նուրբ «բամբակյա» շերտն է: Աշնանային մազաթափությունը տևում է գարնանայինից մի փոքր ավելի շատ, կենդանին վիզուալ ավելի մեծ է երևում (թավ մազածածկույթ ձեռք բերելու արդյունքում), դառնում է ավելի փափուկ:
Գարնանը՝ ցրտից հետո, շունը սկսում է ազատվել տաք մազածածկույթից՝ պատրաստվելով ամառային տապին: Այս սեզոնի մազաթափությունն ավելի կարճ է տևում, սակայն թափվող մազերն ու շան տիրոջ գործը շատանում է. մազեր են լինում գրեթե ամենուրեք՝ բազմոցին, հատակին, անկյուններում, կոշիկների մեջ և այլուր:
Հարկ է նշել, որ բնակարանային պայմաններում ապրող շների մոտ կարող է մազաթափություն նկատվել ամբողջ տարվա ընթացքում, էգի մոտ՝ ամսականների և ծննդաբերության ժամանակ: Եթե ձեր շունը կլոր տարի մազաթափվում է, ապա պետք է անհապաղ միջոցներ ձեռնարկել, քանի որ մազերն աճում են դանդաղ, իսկ մազաթափություն առաջացնող շատ հիվանդություններ արտաքինից տեսանելի են դառնում բավականին ուշ:
Անսպասելի մազաթափության պատճառները և դրա առաջացմանը նպաստող հիվանդությունները բազմազան են. սխալ կազմակերպվող կերակրում, հորմոնալ խանգարումներ (այս դեպքում սովորաբար մազաթափությունն ամբողջ մարմնից հավասարաչափ է ընթանում), մակաբույծներ, ավիտամինոզ, վատ միկրոկլիմա և արհեստական լուսավորում, մարսողական համակարգի, երիկամների, լյարդի և այլ օրգանների հիվանդություններ, ինչպես նաև ալերգիկ ռեակցիաներ, մաշկի էկզեմաներ, սնկային հիվանդություններ: Բոլոր դեպքերում խորհուրդ է տրվում կենդանուն ճիճվաթափել, եթե օրգանիզմի ընդհանուր վիճակը բժշկական տեսանկյունից թույլ է տալիս:
Մազաթափության առաձին պատճառ կարող է հանդիսանալ սթրեսը՝ տեղափոխությունը, հղիությունը, վիրահատությունը:
Մազաթափության ընթացքում պետք է օրական գոնե մեկ անգամ հիմնովին սանրել կենդանուն հատուկ սանրի՝ ֆուրմինատորի օգնությամբ: Այս հատուկ սանրերը 90%-ով քչացնում են մազաթափությունը, առանց վնասելու կենդանուն։ Այն հանում է մեռած և վնասված մազերը՝ պահպանելով առողջները։ Այդպիսով ազատում տիրոջը գլխացավանքից։
Հակառակ դեպքում պոկված և վնասված մազերը (հատկապես երկարամազ և ալիքավոր կամ գանգրահեր շների դեպքում) կխճճվեն և կհանգեցնեն այլ խնդիրների (քորելու պատճառով եղունգներով մաշկի մեխանիկական վնասում, անմիջական թթվածնի պակասի և համաատասխան խոնավ միջավայրի խախտման հետևանքով մաշկի չորացում, էկզեմաներ և այլն), բացի այդ, դրանց հեռացումը դառնում է ցավոտ և էլ ավելի է բարդանում: Երբեմն նույնիսկ հարկ է լինում այդ խճճված հատվածներում մազածածկույթը խորքից կտրել, ինչի արդյունքում շան գեղեցիկ տեսքին կարելի է հրաժեշտ տալ բավականին երկար ժամանակով:
Նման խնդիրներից խուսափելու համար դուք կարող եք կենդանուն լողացնել հատուկ շամպուններով, օգտագործել կոնդիցիոներներ (ոչ մի դեպքում հաճախ չլողացնել շանը), լողացնելուց հետո լավ չորացնել մազերը (դրանք թաց թողնելու արդյունքում մազարմատները սկսում են վնասվել, մահանալ և կրկին գործ կունենանք արհեստականորեն առաջացած մազաթափության հետ)
Ձեզ ենք ներկայացնում մազաթափության և մաշկի որակի բարելավման համար լավագույն ազդեցություն տվող վիտամիններ, որոնց կարող եք ծանոթանալ մեր կայքի դեղատան էջում։
Brewers Yeast Tablets- Գարեջրի Խմորիչներ շների և կատուների համար
Ներկայացված վիտամինները բարելավում են մաշկի, մազերի վիճակը և որակը, նպաստում են նյութափոխանակության բարելավմանը: Կարող եք համակցել գարեջրային խմորիչները (կա՛մ հաբերը, կա՛մ փոշին)՝ մազերի որակը բարձրացնելու համար, սխտորով հաբերը՝ մաշկի վիճակի բարելավման և արտաքին միջատների դեմ պայքարի համար (այն չի հանդիսանում պայքարի հիմնական միջոց), ձկան յուղ (կամ օմեգա, չկիրառել երկուսը միասին) և կալցիումի հաբերը:
Հիշեցնենք, որ վերը նշված համակցումը ներկայացված է պրոֆիլակտիկ միջոցառումների նկատառմամբ, իսկ պաթոլոգիկ երևույթների առկայության դեպքում հարկ է խորհրդակցել անասնաբույժի հետ:
Ժամանակ առ ժամանակ՝ վետերինարի հետ խորհրդակցելուց հետո, կազմակերպել վիտամինաթերապիա՝ հարստացնել նրա սննդային ռացիոնն անհրաժեշտ հանքային նյութերով ( հատկապես աշնան և գարնան ամիսներին):
Սիրով՝ Hafo.am։ Եղե՛ք տեղեկացված
